Herinneringen aan òònze buurte
Toen de Vlaminckhorstweg nog Bouwhuissteeg was
De Bouwhuusstege was vrogger een zaandweg en as 't vöIle erèèngd had, was der gien deurkomm an. Een heleboel mèènsn namm de zundagse schoenn onder 'n àrm as ze nao de kärke gungn en achter café Boerhof op 'n Sikkenbrink trökkn ze die dan an um toch netties veur 'n dag te komm. De weg wöddn trouwens al aorig gauw verhärd met puin en daoròver een laoge teer, mär de näme veraandern niet en dä'w an 'n 'stege' woonn, dät vunne wie niet zo fijn. Toen wie jong wäärn en òòns adres op mossn geevn, zèèn wie altied: Lemelerveldseweg A 181. Daor kloppn niks van; 't huusnummer wel, mär denäme ha'w zelf uutedach. Het verkeer nao Lemelerveld kwaamp toen ollemaole bie òòns langs, de Marktstraote was der nog niet.
Mär 't was der wel mooi woonn en wat ha'w toch de ruumte um te spöln. As het 's aovends lange lich was dee'w met de hele buurte vestöppertie en mangs waa'w an 't hoepeln of knikkern. Ik denke in ien keer, dät er toen haoste nog niet evoetbald wöddn.
Teengòver òòns stund de boerderieje van Hofhuus en daor ko'j oe ok bes vermääkn. As de bärg aorig löög begun te wöddn, ko'j der altied zo mäkkelijk inkomm en mooi òver 't heui nao beneden gliern. Grääds Hofhuus was daor niet zo bliej met, want 't was wel 'n troep. Hee greep dan ok umwiel de härke um de boel weer gläd te krieng...
Vlak bie was 't Bouwhuusbos, daor was altied wat te belèèm. Veuran was 'n vievertie en op dät vievertie hebt verscheiden wichter uut de buurte schäätsnloopm eleerd, die van Hofhuus, de Blanke, Antonissen, Nieboer en wie natuurlik ok. Wie namm dan van huus een stoel met en daor krabbeln wie hen!
As 't veurjaor wöddn, was 't rondum dät vievertie wit van de bosanemoonn. Wie hebt ze jaorn niet meer ezien, mär noe bint ze der weer. Een èèndtie värder bie de waterleiding ko'j fluitiesholt vindn en ons pa was dan mangs een hele zundagmärng druk um fluitis te määkn veur de hele buurte. Een päär wekkn läter zag ie de meidoorn, de krentebossn en de wilde seringn in volle bluui. Ok as wichter ko'j daor van genietn; um nooit te vergettn.
Met ärmenvol bloemm kwame wie in huus en um pinksterbloemm te plukkn gunge wie nao de Dolder, 't laand van Gait Oortwien (noe de iesbäne).
Bie de zommerdag ko'j altied mooi deur de waterleiding loopm: die stund dan dreuge. An weerskaanten ha'j hoge walln met holtopslag en in òònze dreumwereld wäärn dat onderäärdse gangn, die bie 't kasteel heurdn, dät wie bouwdn van takkn en plaggn.
't Bouwhuusbos wöddn toen goed onderhòòldn. Der wäärn mooie slingerpäädn, die in de härfs vol blad laang en waor ie dan zo fijn deur hen konn baggern.
As wie van òòns huus op Heino an gungn, dan woonn an 't èènde van de weg smid Berkhof en a'j dan rechtsof gungn kwam ie in de Baokenbeltstege, ok 'n zaandweg. Naos Berkhof had Polstra zien gruuntetuun. Op 'n keer zaang wie daor van die mooie oranje dinge hangn. 't Wäärn gien appels, mär wat 't wel wäärn, dät wusse wie ok niet. Wie dachn, zie staot in 'n gruuntetuun, dus zölt ze wel niet vergiftiq wèèn. In tweedonker binne wie der toen es hen egaon en hebt er een päär of eplukt. Wie beetn der in, mär zie smääkn närgens nao en zie leekn op 't oge zo mooi. Dät was òònze eerste kennismäking met tomaatn....
Een èèndtie värder rechts stund de bärg van Blom. Daor za'k mär niks över vertelln, want half Heino, dät wil zengn de jongeluu, kenn ollemaole de bärg van Blom... Nee, um daor värder op in te gaon is niet zo belangriek, teminsn a'j met heemkunde bezig bint...
Dit wäarn zo mär een päär herinneringn an òònze buurte.
Colofon
Kwartaalblad Omheining, maart 1986 nummer 1
