Toen ik in 1948 net as wijkzuster in Heino begunne, vreug dokter Doyer mie of ik es noa de veldhoek wol goan; doar had een olde man longontstekken en zien vrouwe was al 80 joar. Die kon zich der ok niet allenig met redden.
Ik mosse toen nog alles op de fietse doen. 't Was febrewari en bitter kold. Zo kwam ik doar an um een uur of tiene, helemoal verkleumd, kold töt op de botten.
Het was een keurig huussie en binnen was 't brandschone, ie kon' der bie wieze van sprekken van de vloere etten. Opoe vreug of ik eerst een bäkkie koffie lussen. Nou, det sleug ik niet of, want zie hadden oons altied eleerd; ie mut nooit drekt beginnen met wassen, doar schrikt de luu van.
Ik gunge zitten, opoe schunk de koffie in en wie drunken gezellig met menaere een bäkkie. Ik krege der ok nog een plakke koeke bie. Ik had nog mär net mien köppie löög of opoe vreug o'k der nog iene zol lusten. Woarop ik zèè: Nou wel graeg! Want het smaeken biezunder goed. Joa, zèè opoe, de deerns zegt ok altied: bie moe in de Veldhoek drinke wie toch nog de lekkerste koffie. En zo gunk ok het tweede bäkkie der lekker in.
Toen mos ik toch es beginnen met de patient, die intussen al oardig an mie ewend was. Ik vreuge, woar a'k een bäkkie en water konne vinden um opa te wassen. Nou, de pompe was op de delle en doar stund ok wel een komme. Ikke noa de delle en wat zag ik doar töt mien grote schrik? Veer sikken! En as ik ärgens een hekel an hadde, dan was 't wel an sikkenmelk. Ik begun al mislijk te wödden. Ik vreug an opoe, in de hoppe de'k gien sikkenmelk had edrunken, of zie de melk altied uut 't dorp mossen halen, want dan kon ik maenvrog mooi wat metnemmen.... Niks der van, zèè opoe, wie hebt veer sikken en die geeft het hele joar melk genog veur eigen gebruuk.
Ik hulpe de patient, maeken 't bedde op, rumen het wasgoed op en brache het water noa de delle, woar as de sikken stunden te mekkeren. Toen wödden ik echt misselijk!
Ikke op de fietse op huus an en toen kwam ailes der uut, eerlijk woar. Noe wee'j met menaere: ok een wijkzuster kan zich wel es anstellen...
De andere màrgen zèè'k da'k gien koffie moche drinken. Ik had last van de maege, zèè'k en ik wol liever thee. Opoe vruug of der ok een bettie melk in mos. En zie wol ok wel een beker melk warm maeken, a'k het in de maege hadde, det was der zo goed veur! Nee, zèè'k, det maa'k niet van de dokter...
Ik heb der plezierig ewärkt en de patient knappen goed op. Opoe had aait ärg völle beklag met mie.
Note: De foto van boerderij Kaleveld is alleen toegevoegd ter illustratie omdat op de achtergrond wat geiten staan. Het is zeker niet gezegd dat Zuster Maatman naar deze boerderij ging.
Colofon
Kwartaalblad Omheining, nummer 2, juni 2010
Dit verhaal komt uit: "Op zien Heino's, 2e bundel'
